［快過陳同佳］聽日就出發去台北。自問自答16條
TLDR：埃汾聽日出發去台北辦證，計埋隔離要27號先回港。返香港仲要隔離，所以未見面嘅至少要等到1月11日。想知隔離最新情況，同埋最新市況，記住訂 Patreon（https://bityl.co/4Y0h）。月費100蚊唔使，唔啱聽咪cut 咗佢—個個月都有十幾人cut的—不過又有百幾人加入之嘛。
Q1：做乜去台北？
A1：咁就，梗係唔係旅行啦—都其實有旅行，但主要目的，係搞個居留證。
Q2：你唔係搞咗移民台灣？居留證係乜？
A2：由頭到尾只係埃汾睇拎咗護照，我係冇的，我只係配偶身份。居留證喎，就唔係護照，冇得投票，冇得免簽去美國。咁你綠卡同美國護照都唔同啦，身份證同特區護照亦唔同。搞咗咪有張證，之後就唔使做台證咁咯。但都仲唔係公民，要做公民必定要留一年（埃汾太就留咗）。
Q3：因乜要而家搞？今次唔去有乜後果？
A3：原本係復活節去搞，後來疫情去唔到，延期六個月，咁好快六個月又到。再唔搞？我唔離婚的話（大吉利是！），咁又唔係世界末日，但由頭搞過，煩好多咯。又要去驗多次身，貪得意咩。又要去拎多次良民證，貪得意咩。況且，今年啲年假都未清，一鑊過搞掂埋佢。
Q4：咁幾時搬去台灣？
A4：FAQ，呢排每一次同Patreon讀者食飯都會問。答案係：「短時間係小概率事件，長時間係大概率事件」。人話，即係我諗咗無數次啦，但呢刻我從冇打算辭工（畀人炒另計，但可以再挴工），所以未來一年唔會，可能兩三年都唔會。但十年後似乎機會就幾大。
Q5：係咪要做核酸檢測？
A5：是的！早兩日去咗吐口水，我即時好佩服啲球星，居然咁多口水咁大篤可以吐，仲不費吹灰之力（你睇列卡特！）。我呢，朝早起身，口又乾，佢又唔畀你飲水刷牙，搞咗好耐都係冇乜，十分辛苦的。最後先得少少，不過憑我有限嘅科學常識，應該夠晒—你驗血都係驗幾滴之嘛，唔使抽晒成身。而呢刻，我係仲未知道結果嘅！如果最後中招，或者個樣本被打回頭，就很煩了。前者固然唔使去，後者，都要延遲幾日。
Q6：去幾耐？係咪要隔離14日？
A6：12月6日星期日朝早上機，當日唔計數，之後隔離足14日，7號至20號。21號就可以出關，但27號先返香港。之後再隔離14日，下年1月11日返工。即係，我會嗰邊過埋聖誕，但年尾會返香港，到1月11日先返工
Q7：住邊？
A7：台北，會住兩間唔同酒店，完成隔離後換間好啲正常啲嘅。隔離就要指定咗有堆防疫酒店。
Q8：隔離酒店幾錢？
A8：都千幾蚊一晚。梗係港紙！點解咁貴？首先呢堆防疫酒店就係貴啲（多好多工夫）。另外，困住十四日喎大佬，我揀咗間相當貴的。而仲有，仲要揀有露台嘅，有窗。
Q9：係咪包餐？
A9：加錢咪得。但掉轉，本人當然唔食酒店啲餐。咪玩啦。咁多得科技先進，可以用外賣app，叫鼎泰豐 春水堂固然得，甚至你叫打邊爐都得（但我唔會咁玩，自己間房呀大佬，十四日）。不過平嘅酒店呢，就十分老味，即使你叫外賣都只能指定用餐時間。想好似埃汾咁鍾意幾點食就幾點食，咁人地咪要拎上拎落，人手都要多啲，咪會貴啲。
Q10：咁多年假嘅你？
A10：呢句真係夠晒冒犯。實情我公司同我Grade嘅應該全部都係咁多日假，咁而我公司嘅劈奇廚話係相當有競爭力，咁真係同行都差不多的。我當年在耆英後期都廿幾日假啦又。而且，今年我都冇放過假！「唔係喎我記得你2月去咗越南」「係呀，不過係拎緊上年嘅假」
Q11：機票幾錢？
A11：答案係：唔知。但唔會平，唔好以為冇人坐就平。供求啫，啲機都cut晒。呢個時侯仲要去嘅人，應該相當之唔 price sensitive嘅。不過我真係唔知幾錢，因為我用里數換。反正仲剩廿幾萬（都話今年冇放過假）。咁都好似用咗3萬先換到
Q12：隔離有乜做？
A12：答案，係冇嘅。因為完全唔可以離開間房，而埃汾太亦唔會去（去都應該要分房）。咁有乜好做？咪睇email，睇報紙，睇書，上Facebook，在呢度出文，寫ＰPatreon。仲有可以睇下Netflix（新裝！），叫下外賣（又係新裝！）。呀同埋，寫書。係喎。寫書！而家唔寫等幾時。
Q13：隔離完又有乜做？
Q13：答案，咪又係平時嗰啲。睇下戲，食下嘢，搵下朋友食飯咁。仲有乜做？
Q14：聽聞埃汾有錢收？
A14：是真的！隔離嗰14日，每日有返1000台幣補助！夾埋晒都成三千幾近四千港紙呀！另外，仲有「消費三倍券」，我畀1000台幣，佢會畀返3000蚊消費券我。點解我有呢啲嘢？因為我係台灣公民嘅配偶嘛。
Q15：咁會唔會影響寫文？
A15：應該完全唔會。不過我有啲擔心都係會好忙，人生。唔好忘記中途仲要開下會咁。
Q16：有冇特備節目？
A16：可能係有嘅，可能拍片，或者玩下live chat，或者寫下台北美地圖（我大大話話都去咗幾十次）。記得留意Patreon（https://bityl.co/4Y0h）
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
Search